Skapandi útiverur list- og náttúrumeðferðarnámskeið

Námskeiðinu okkar Skapandi útiverur, list- og náttúrumeðferðarnámskeið fyrir börn með sérþarfir lauk með pompi og pragt fyrir skemmstu.

Íris Lind Sævarsdóttir kennari og listmeðferðarfræðingur, Hildur Bergsdóttir félagsráðgjafi með áherslu á náttúrumeðferð og útivistarþjálfari, Sæunn Sigvaldadóttir þroskaþjálfi og býflugnabóndi og Angelika Liebermeister leikskólakennari, tamingakona og sérkennari í hestamennsku fatlaðra komu að námskeiðinu ásamt aðstoðarfólki.

Námskeiðið samanstóð af fimm síðdegissamverustundum í náttúrunni við Eyvindará þar sem unnið var með frumöflin; vind, vatn, eld og jörð auk þess sem skapað var úr náttúrulegum efniviði úr dýraríkinu. Mikil áhersla var lögð á fjölbreytta örvun og sköpun af ýmsu tagi. Allir tímar hófust á trommuhring sem helgaður var því náttúrufrumafli sem unnið var með hverju sinni og því að sitja saman í hring, tilheyra og leggja sinn takt að mörkum til heildarinnar.

Að auki var farið í tvær lengri ævintýraferðir á laugardögum, fyrri ferðinni var heitið í Hallormsstaðaskóg þar sem hópurinn kynnti sér undraheim býflugnanna, spreytti sig í villieldhúsinu, sat við eldinn eða jafnvel bara lagði sig í hengirúmi milli ilmandi barrtrjáa, svo var auðvitað brugðið á leik, sullað í læknum og skapað úr efniviði skógarins.

Síðari ævintýraleiðangurinn lá alla leið að Geirastöðum í Hróarstungu þar sem við kíktum eftir sel, sáum gæsir á flugi og hreindýr á vappi, kynntumst hestum og brugðum okkur svo á bak. Þar unnust margir sigrar og stórir og brosin og glamparnir í augunum voru í fullu samræmi við það. Milli reiðtúra var ljúft að gæða sér á eldpoppi og glóðaglæddum súkkulaðibálbönunum og skapa og skrifa sögur í sólskininu.

Námskeiðið sem styrkt var af Mennta- og barnamálaráðuneytinu fékk afar góðar viðtökur og ljóst að þörf og áhugi er á fleiri námskeiðum sem þessum.

Látum hér fylgja með ummæli eins foreldris sem segja allt sem segja þarf:

,,Takk kærlega fyrir ykkar frábæra starf. barnið mitt var að elska þetta.

Það þrífst ílla í hópastarfi og á erfitt með að vera án okkar foreldrana eins og skóla,frístund æfingum osfrv. Erum búin reyna ansi margt.

Loksins fannst barninu það tilheyra og elskaði að fara í Nátturuskólann og fann sig loksins.

Er mikið nátturubarn og vill helst alltaf vera úti og brasa og að hafa svona starf fyrir svona krakka er ómetanlegt."